ಮಸೀದಿ ಕೊಳದ ಮೀನುಗಳು ಮತ್ತು ನಮಾಜ್

ಏ. ಕೆ. ಕುಕ್ಕಿಲ

ವುಝೂ (ಅಂಗಶುದ್ಧಿ) ಮಾಡುವ ಉದ್ದೇಶದಿಂದ ಆತ ಮಸೀದಿಯ ನೀರಿನ ಕೊಳದ (ಹೌಲ್) ದಂಡೆಯಲ್ಲಿ ಕುಳಿತ. ಹಳೆಯ ಪರಿಚಯವೆಂಬಂತೆ ಮೀನುಗಳು ಆತನ ಬಳಿಯೇ ಗುಂಪುಗೂಡಿದುವು. ಒಂದು ಮೀನು ನೀರಿನಿಂದ ಮೇಲಕ್ಕೆ ಚಿಮ್ಮಿ ಸ್ವಾಗತವನ್ನು ಕೋರಿತು. ಆ ಬಳಿಕ ಒಂದೊಂದೇ ಮೀನುಗಳು ಅವುಗಳದ್ದೇ ಆದ ಶೈಲಿಯಲ್ಲಿ ನರ್ತನಕ್ಕಿಳಿದವು. ಆಕಾರ, ಗಾತ್ರ, ಜಾತಿಗಳಿಗೆ ಹೊಂದಿಕೊಂಡು ಈ ನರ್ತನಗಳಲ್ಲಿ ವ್ಯತ್ಯಾಸಗಳೂ ಇದ್ದುವು. ಆತ ಅವುಗಳ ಸಂಖ್ಯೆಯನ್ನು ಎಣಿಸಲು ಪ್ರಯತ್ನಿಸಿದ. ಸಾಧ್ಯವಾಗಲಿಲ್ಲ. ಒಂದನ್ನಾದರೂ ಹಿಡಿದು ಮುದ್ದಿಸಬೇಕು ಅಂದುಕೊಂಡ. ಅದೂ ಕೈಗೂಡಲಿಲ್ಲ. ಆ ಮೀನುಗಳ ಮೇಲೆ ಯಾಕೋ ಆತನಲ್ಲಿ ಮೋಹ ಉಕ್ಕಿತು. ಭಾವಪರವಶತೆಯಲ್ಲಿ ಮೀನುಗಳೊಂದಿಗೆ ಲೀನವಾಗಿ ಹೋದ…

ಮಧ್ಯಾಹ್ನದ ನಮಾಜ್ ಮುಗಿಸಿ ಭಕ್ತರು ಮಸೀದಿಯಿಂದ ಹೊರಹೋಗುವ ಸದ್ದು ಆತನನ್ನು ವಾಸ್ತವಕ್ಕೆ ತಂದಿತು. ಮಸೀದಿಯ ಗುರುಗಳು ಪ್ರವಚನ ನೀಡುತ್ತಿದ್ದರು:
“ಚಿತ್ರ ಇರುವ ಬಟ್ಟೆ ಧರಿಸಿ ನಮಾಜ್ ನಿರ್ವಹಿಸಬೇಡಿ, ಅದರಿಂದ ಇತರರ ಏಕಾಗ್ರತೆಗೆ ಭಂಗ ಉಂಟಾಗುತ್ತದೆ…” ಅವರ ಪ್ರವಚನ ಮುಂದುವರಿದಿತ್ತು. ಆತ- ತನ್ನ ನಮಾಜ್ ಗೆ ಭಂಗ ತಂದ ಮೀನುಗಳತ್ತ ನೋಡಿದ. ಅವು ನಕ್ಕಂತೆ ಅನಿಸಿತು.

ಆತ ಸರಸರನೆ ವುಝೂ ನಿರ್ವಹಿಸಲಾರಂಭಿಸಿದ.