ಸನ್ಮಾರ್ಗ ವಾರ್ತೆ
ಭಟ್ಕಳ: ಭಟ್ಕಳ್ ಎಜುಕೇಶನ್ ಟ್ರಸ್ಟ್‌ನ ಸಾಗರ್ ರಸ್ತೆಯಲ್ಲಿರುವ ನ್ಯೂ ಇಂಗ್ಲೀಷ್ ಪಿಯು ಕಾಲೇಜಿನಲ್ಲಿ ಸೀರತ್ ಅಭಿಯಾನದ ಪ್ರಯುಕ್ತ ವಿದ್ಯಾರ್ಥಿಗಳಿಗಾಗಿ ಉಪನ್ಯಾಸ ಕಾರ್ಯಕ್ರಮ ನಡೆಯಿತು.
ಕಾರ್ಯಕ್ರಮದ ಪ್ರಮುಖ ಉಪನ್ಯಾಸಕರಾಗಿ ಜಮಾಅತೆ ಇಸ್ಲಾಮೀ ಹಿಂದ್, ಕರ್ನಾಟಕ ರಾಜ್ಯ ಕಾರ್ಯದರ್ಶಿ ಜನಾಬ್ ಅಕ್ಬರ್ ಅಲಿ ಉಡುಪಿಯವರು, ಸುಮಾರು 55 ನಿಮಿಷಗಳ ಕಾಲ ಪ್ರಭಾವಶಾಲಿ ಭಾಷಣ ಮಾಡಿದರು. 190 ವಿದ್ಯಾರ್ಥಿಗಳು ಮತ್ತು 9 ಉಪನ್ಯಾಸಕರು ಈ ಕಾರ್ಯಕ್ರಮದಲ್ಲಿ ಹಾಜರಿದ್ದರು. ಅವರ ಜೊತೆಯಲ್ಲಿ ಜಮಾಅತೆ ಇಸ್ಲಾಮೀ ಹಿಂದ್ ಭಟ್ಕಳ ಶಾಖೆಯ ಅಧ್ಯಕ್ಷ ಮೌಲಾನಾ ಜುಬೇರ್ ಎಸ್‌ಎಮ್ ಸಾಹಬ್, ಸೈಯದ್ ಎಸ್‌ಎಮ್ ಸಾಹಬ್ ಮತ್ತು ಹಶಿಮ್ ಕೋಲಾ ಸಾಬ್ ಕೂಡ ಹಾಜರಿದ್ದರು.
ಅಕ್ಬರ್ ಅಲಿ ಸಾಬ್ ವಿದ್ಯಾರ್ಥಿಗಳೊಂದಿಗೆ ತೌಹೀದ್ (ಅಲ್ಲಾಹನ ಏಕತೆಯನ್ನು) ಮತ್ತು ಆಖಿರತ್ (ಪರಲೋಕ) ಕುರಿತು ಆಳವಾದ ಚಿಂತನೆಗಳನ್ನು ಹಂಚಿದರು. ಅವರು ವಿದ್ಯಾರ್ಥಿಗಳಿಗೆ ‘ನಾವು ಯಾರು? ನಾವು ಎಲ್ಲಿಂದ ಬಂದಿದ್ದೇವೆ? ಮತ್ತು ನಾವು ಎಲ್ಲಿಗೆ ಹೋಗುತ್ತಿದ್ದೇವೆ?’ ಎಂಬ ಮೂಲಭೂತ ಪ್ರಶ್ನೆಗಳ ಬಗ್ಗೆ ಆಲೋಚಿಸಲು ಪ್ರೇರೇಪಿಸಿದರು. ಇದಲ್ಲದೆ, ಅವರು ಸಹೋದರತ್ವ, ಶಾಂತಿ, ಪ್ರೀತಿ ಮತ್ತು ಮಾನವೀಯತೆಯ ಮಹತ್ವವನ್ನು ವಿದ್ಯಾರ್ಥಿಗಳಿಗೆ ತಿಳಿಸಿದರು, ಈ ಮೌಲ್ಯಗಳನ್ನು ತಮ್ಮ ಜೀವನದಲ್ಲಿ ಅಳವಡಿಸಿಕೊಳ್ಳಲು ಪ್ರೇರೇಪಿಸಿದರು.
