ಇಸ್ರೇಲನ್ನು ರಕ್ಷಿಸಿದರೆ, ನಿಮ್ಮ ವಾಯು-ನೌಕಾನೆಲೆಗಳು ಧ್ವಂಸಗೊಳ್ಳುತ್ತವೆ: ಅಮೆರಿಕ, ಫ್ರಾನ್ಸ್, ಯುಕೆಗೆ ಇರಾನ್ ತೀವ್ರ ಎಚ್ಚರಿಕೆ

0
1675

ಸನ್ಮಾರ್ಗ ವಾರ್ತೆ

ಟೆಹರಾನ್: ಇಸ್ರೇಲ್ ಮತ್ತು ಇರಾನ್ ನಡುವೆ ಉಂಟಾಗಿರುವ ತೀವ್ರ ಉದ್ವಿಗ್ನತೆಯು ಪಾಶ್ಚಿಮಾತ್ಯ ರಾಷ್ಟ್ರಗಳಿಗೂ ಹರಡುವ ಸಂಕೇತಗಳನ್ನು ತೋರಿಸುತ್ತಿದೆ. ಇಸ್ರೇಲ್‌ನ ದಾಳಿಗೆ ಪ್ರತಿಯಾಗಿ ಇರಾನ್‌ ಇದೀಗ ಎಚ್ಚರಿಕೆ ನೀಡಿದ್ದು, ಅಮೆರಿಕಾ, ಬ್ರಿಟನ್ ಮತ್ತು ಫ್ರಾನ್ಸ್ ದೇಶಗಳು ಇಸ್ರೇಲನ್ನು ರಕ್ಷಿಸಲು ಮುಂದಾದರೆ, ಅವರ ಮಿಲಿಟರಿ ನೆಲೆಗಳು ಮತ್ತು ನೌಕಾನೆಲೆಗಳ ಮೇಲೂ ದಾಳಿ ನಡೆಯಲಿದೆ ಎಂದು ಹೇಳಿದೆ.

ಇಸ್ರೇಲ್‌ ಜೂನ್ 13ರಂದು ಇರಾನ್‌ನ ಪರಮಾಣು ಸೌಲಭ್ಯಗಳ ಮೇಲೆ ದಾಳಿ ನಡೆಸಿತ್ತು. ಇದರಲ್ಲಿ ರೆವಲ್ಯೂಷನರಿ ಗಾರ್ಡ್ ಕಚೇರಿ ಧ್ವಂಸವಾಗಿ, ಅವರ ಮುಖ್ಯಸ್ಥ ಮೇಜರ್ ಜನರಲ್ ಹುಸೇನ್ ಸಲಾಮಿ ಸಾವನ್ನಪ್ಪಿದ್ದಾರೆ. ನಂತರ ಇಸ್ರೇಲ್‌ ಮತ್ತೊಮ್ಮೆ ಇರಾನ್‌ನ ಅಣು ಸ್ಥಾವರಗಳ ಮೇಲೂ ದಾಳಿ ನಡೆಸಿದ್ದು, ಇಬ್ಬರು ಅಧಿಕಾರಿಗಳು ಮೃತಪಟ್ಟಿದ್ದಾರೆ. ಇದಕ್ಕೆ ಪ್ರತಿಯಾಗಿ ಇರಾನ್‌ ಟೆಲ್ ಅವಿವ್ ಮೇಲೆ ಕ್ಷಿಪಣಿ ದಾಳಿ ನಡೆಸಿದೆ ಪ್ರತೀಕಾರ ತೀರಿಸಿಕೊಳ್ಳಲು ಮುಂದಡಿ ಇಟ್ಟಿದೆ.

ಈ ಮಧ್ಯೆ, ಇರಾನ್‌ನ ಮಿಲಿಟರಿ ಅಧಿಕಾರಿ ಹೇಳುವಂತೆ, ಇಸ್ರೇಲ್‌ ಮೇಲೆ ದಾಳಿ ಮುಂದುವರಿಯಲಿದ್ದು, ಇಸ್ರೇಲ್‌ ಬೆಂಬಲಿಸುವ ರಾಷ್ಟ್ರಗಳ ನೆಲೆಗಳಿಗೂ ದಾಳಿಯ ಸಾಧ್ಯತೆ ಇದೆ. ಅಮೆರಿಕಾ, ಫ್ರಾನ್ಸ್, ಬ್ರಿಟನ್ ಮತ್ತು ಇತರ ಪಾಶ್ಚಿಮಾತ್ಯ ರಾಷ್ಟ್ರಗಳು ಇಸ್ರೇಲ್ ಪರವಾಗಿ ನಿಂತರೆ, ಅವರ ಮೇಲೂ ಪ್ರತ್ಯುತ್ತರ ದಾಳಿಯನ್ನು ನಡೆಸುವುದು ಅನಿವಾರ್ಯವಾಗುತ್ತದೆ ಎಂದು ಹೇಳಲಾಗಿದೆ. ಈ ಮಧ್ಯೆ ಅಮೆರಿಕಾ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, “ಇಸ್ರೇಲ್‌‌ನ ರಕ್ಷಣೆಗೆ ನಾವು ಸಿದ್ಧ” ಎಂದು ಹೇಳಿದ್ದು, ಪರಿಸ್ಥಿತಿಯ ಗಂಭೀರತೆ ಇನ್ನೂ ಹೆಚ್ಚಿಸಿದೆ. ಇನ್ನು ಫ್ರಾನ್ಸ್ ಸಹ ಇಸ್ರೇಲ್ ಬೆಂಬಲಕ್ಕೆ ನಿಂತಿದ್ದು, ಈ ಘರ್ಷಣೆ ಮತ್ತಷ್ಟು ವಿಸ್ತರಿಸಬಹುದೆಂಬ ಆತಂಕ ಮೂಡಿದೆ.

ಇಸ್ರೇಲ್ ಕೂಡ ತೀವ್ರ ಪ್ರತಿಕ್ರಿಯೆ ನೀಡಿದ್ದು, “ಇರಾನ್‌ ದಾಳಿ ಮುಂದುವರಿಸಿದರೆ, ಅದರ ರಾಜಧಾನಿ ಟೆಹರಾನನ್ನು ಸಂಪೂರ್ಣವಾಗಿ ನಾಶ ಮಾಡುತ್ತೇವೆ” ಎಂದು ಎಚ್ಚರಿಕೆ ನೀಡಿದೆ. ಬ್ರಿಟನ್ ಸರ್ಕಾರ ಸಂಘರ್ಷ ತಗ್ಗಿಸಲು ಮನವಿ ಮಾಡಿದ್ದು, ಪೋಪ್ ಫ್ರಾನ್ಸಿಸ್ ಶಾಂತಿ ಪ್ರಾರ್ಥನೆ ಮಾಡಿದ್ದಾರೆ. ಈ ಹಿನ್ನೆಲೆಯಲ್ಲಿ ಮಧ್ಯಪ್ರಾಚ್ಯದಲ್ಲಿ ಉಂಟಾಗಬಹುದಾದ ಯುದ್ಧದ ಅಪಾಯ ಹಾಗೂ ಜಾಗತಿಕ ಬಿಕ್ಕಟ್ಟಿನ ಆತಂಕ ಇನ್ನೂ ಹೆಚ್ಚಾಗಿದೆ.