ಹಾರ್ಮುಝ್‌ ಜಲಸಂಧಿಯಲ್ಲಿ ಯುಎಸ್‌ ಡ್ರೋನ್ ಮೇಲೆ ಇರಾನ್ ದಾಳಿ; ಜೋರ್ಡನ್‌ನಲ್ಲಿರುವ ಅಮೆರಿಕನ್‌ ನೆಲೆಗೂ ಹಾನಿ

0
305

ಸನ್ಮಾರ್ಗ ವಾರ್ತೆ

ಟೆಹ್ರಾನ್: ಹಾರ್ಮುಝ್‌ ಜಲಸಂಧಿಯನ್ನು ಪ್ರವೇಶಿಸಿದ್ದ ಅಮೆರಿಕದ ಮಾನವರಹಿತ ಕಡಲ ಕಣ್ಗಾವಲು ನೌಕೆಯ ಮೇಲೆ ದಾಳಿ ಮಾಡಿರುವುದಾಗಿ ಇರಾನ್‌ನ ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್ (ಐಆರ್‌ಜಿಸಿ) ತಿಳಿಸಿದೆ. ಜಲಸಂಧಿಯ ಪ್ರವೇಶದ್ವಾರದಲ್ಲಿ ಈ ದಾಳಿ ನಡೆದಿದ್ದು, ಅಮೆರಿಕದ ಐದನೇ ನೌಕಾಪಡೆಯ ಭಾಗವಾಗಿ ಕಾರ್ಯನಿರ್ವಹಿಸುತ್ತಿದ್ದ ‘ಸೇಲ್‌ಡ್ರೋನ್’ ಇರಾನ್‌ನ ಭದ್ರತೆಗೆ ಬೆದರಿಕೆಯೊಡ್ಡಿದ್ದರಿಂದ ಈ ದಾಳಿ ನಡೆಸಲಾಗಿದೆ ಎಂದು ಐಆರ್‌ಜಿಸಿ ಹೇಳಿಕೆಯಲ್ಲಿ ತಿಳಿಸಿದೆ.

ವಿಶ್ವದ ಅತ್ಯಂತ ಪ್ರಮುಖ ತೈಲ ಸಾಗಾಣಿಕೆ ಮಾರ್ಗಗಳಲ್ಲಿ ಒಂದಾದ ಹಾರ್ಮುಝ್‌ ಜಲಸಂಧಿಯ ಮೇಲೆ ತನಗೆ ಸಂಪೂರ್ಣ ನಿಯಂತ್ರಣವಿದೆ ಎಂದು ಇರಾನ್ ಎಚ್ಚರಿಸಿದೆ ಮತ್ತು ಅನಧಿಕೃತವಾಗಿ ಪ್ರವೇಶಿಸುವ ಯಾವುದೇ ಅತಿಕ್ರಮಣದ ಮೇಲೆ ದಾಳಿ ಮಾಡುವುದಾಗಿ ತಿಳಿಸಿದೆ. ಐಆರ್‌ಜಿಸಿಯ ಈ ಹೇಳಿಕೆಗೆ ಅಮೆರಿಕ ಇದುವರೆಗೆ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ.

ಸೌರ ಮತ್ತು ಪವನ ಶಕ್ತಿಯಿಂದ ಚಲಿಸುವ ಈ ಡ್ರೋನ್‌ಗಳು ಸಮುದ್ರದಲ್ಲಿ ಒಂದು ವರ್ಷದವರೆಗೆ ನಿರಂತರ ಕಣ್ಗಾವಲು ಕಾರ್ಯಾಚರಣೆ ನಡೆಸಬಲ್ಲವು. ಇತ್ತೀಚಿನ ದಿನಗಳಲ್ಲಿ ಅಮೆರಿಕದ ಮತ್ತೊಂದು ಮಾನವರಹಿತ ನೀರೊಳಗಿನ ಡ್ರೋನ್ ಅನ್ನು ತಾನು ವಶಪಡಿಸಿಕೊಂಡಿರುವುದಾಗಿ ಇರಾನ್ ಹೇಳಿಕೊಂಡಿದೆ. ಆದಾಗ್ಯೂ, ತಾಂತ್ರಿಕ ದೋಷದಿಂದಾಗಿ ತನ್ನ ನೀರೊಳಗಿನ ಡ್ರೋನ್ ಕಾರ್ಯನಿರ್ವಹಿಸದ ಸ್ಥಿತಿಯಲ್ಲಿತ್ತು ಎಂದು ಅಮೆರಿಕದ ಸೇನೆಯು ಸ್ಪಷ್ಟಪಡಿಸಿದೆ.

ಈ ಮಧ್ಯೆ, ಜೋರ್ಡನ್‌ನಲ್ಲಿರುವ ಮುವಾಫಕ್ ಸಾಲ್ಟಿ ಯುಎಸ್ ವಾಯುನೆಲೆಯ ಮೇಲೆ ಇರಾನ್ ಕ್ಷಿಪಣಿಗಳು ಅಪ್ಪಳಿಸಿದ್ದು, ಅಮೆರಿಕದ ಯುದ್ಧವಿಮಾನಗಳಿಗೆ ಹಾನಿಯಾಗಿರುವುದಾಗಿ ಅಮೆರಿಕದ ಅಧಿಕಾರಿಗಳನ್ನು ಉಲ್ಲೇಖಿಸಿ ರಾಯ್ಟರ್ಸ್ ವರದಿ ಮಾಡಿದೆ. ಈ ದಾಳಿಯಿಂದ ಎ-10 ಥಂಡರ್‌ಬೋಲ್ಟ್ II ವಿಮಾನದ ರೆಕ್ಕೆಗೆ ಹಾನಿಯಾಗಿದೆ ಮತ್ತು ಎಂಟು ಎಫ್-15 ಯುದ್ಧವಿಮಾನಗಳು ಜಖಂ ಗೊಂಡಿವೆ.

ಫೆಬ್ರವರಿಯಲ್ಲಿ ಅಮೆರಿಕ-ಇರಾನ್ ಯುದ್ಧ ಆರಂಭವಾದಾಗಿನಿಂದ 18 ಅಮೆರಿಕನ್ ಸೈನಿಕರು ಸಾವನ್ನಪ್ಪಿದ್ದಾರೆ ಮತ್ತು 800 ಕ್ಕೂ ಹೆಚ್ಚು ಮಂದಿ ಗಾಯಗೊಂಡಿದ್ದಾರೆ ಎಂದು ವರದಿಗಳು ತಿಳಿಸಿವೆ. ಏತನ್ಮಧ್ಯೆ, ಇರಾನ್ ಮೇಲೆ ಅಮೆರಿಕ ನಡೆಸಿದ ದಾಳಿಯಲ್ಲಿ ಮಹಿಳೆಯರು ಮತ್ತು ಮಕ್ಕಳು ಸೇರಿದಂತೆ ಸಾವಿರಾರು ಜನರು ಸಾವನ್ನಪ್ಪಿದ್ದಾರೆ.

ಹಾರ್ಮುಝ್‌ ನಂತರ ಕೆಂಪು ಸಮುದ್ರದ ಬಾಬ್ ಅಲ್-ಮಂಡಬ್ ಸಾಗಾಣಿಕೆ ಮಾರ್ಗದಲ್ಲೂ ಉದ್ವಿಗ್ನತೆ ಹೆಚ್ಚುತ್ತಿರುವುದರಿಂದ ಜಾಗತಿಕ ತೈಲ ಬೆಲೆ ಗಗನಕ್ಕೇರುತ್ತಿದೆ. ತೈಲ ಬೆಲೆಯು ಶೇಕಡಾ 7 ರಷ್ಟು ಏರಿಕೆಯಾಗಿ ಪ್ರತಿ ಬ್ಯಾರಲ್‌ಗೆ 108 ಡಾಲರ್‌ ತಲುಪಿದೆ. ಈ ಮಧ್ಯೆ, ಉದ್ವಿಗ್ನತೆಯನ್ನು ಕಡಿಮೆ ಮಾಡಲು ಸೌದಿ ಮತ್ತು ಇರಾನ್ ವಿದೇಶಾಂಗ ಸಚಿವರು ದೂರವಾಣಿ ಮೂಲಕ ಮಾತುಕತೆ ನಡೆಸಿದ್ದಾರೆ ಎಂದು ವರದಿಯಾಗಿದೆ.

https://m.x.com/trtworld/status/2098252962329932239/video/1?launch_app_store=true&ct=engagement_view_media