ಸನ್ಮಾರ್ಗ ವಾರ್ತೆ
ಗಾಝಾ ಸಿಟಿ: ಪ್ಯಾಲೆಸ್ಟೀನಿಯರ ವಿರುದ್ಧದ ನರಮೇಧದ ಯುದ್ಧದ ಸಮಯದಲ್ಲಿ ಇಸ್ರೇಲ್ , ಗಾಝಾ ಪಟ್ಟಿಯಲ್ಲಿರುವ 79% ಮಸೀದಿಗಳನ್ನು ನಾಶಪಡಿಸಿದೆ ಎಂದು ಗಾಝಾದ ಧಾರ್ಮಿಕ ವ್ಯವಹಾರಗಳ ಸಚಿವಾಲಯ ಶನಿವಾರ ಪ್ರಕಟಿಸಿದೆ.
ಇಸ್ರೇಲಿ ಸೇನೆಯು ಗಾಝಾದ 1,245 ಮಸೀದಿಗಳಲ್ಲಿ 814 ಅನ್ನು ನೆಲಸಮಗೊಳಿಸಿದೆ ಮತ್ತು ಅದರ ತೀವ್ರವಾದ ಬಾಂಬ್ ದಾಳಿಯು 148 ಮಸೀದಿಗಳನ್ನು ತೀವ್ರವಾಗಿ ಹಾನಿಗೊಳಿಸಿದೆ ಎಂದು ಸಚಿವಾಲಯ ಬಹಿರಂಗಪಡಿಸಿದೆ.
ಮಸೀದಿಗಳ ಜೊತೆಗೆ, ಮೂರು ಚರ್ಚ್‌ಗಳನ್ನು ಸಹ ಧ್ವಂಸಗೊಳಿಸಲಾಗಿದೆ. 60 ಸ್ಮಶಾನಗಳಲ್ಲಿ 19 ಅನ್ನು ಉದ್ದೇಶಪೂರ್ವಕವಾಗಿ ಗುರಿಯಾಗಿಸಲಾಗಿದೆ ಎಂದು ಹೇಳಿಕೆ ತಿಳಿಸಿದೆ.
ಬಾಂಬು ದಾಳಿಯಲ್ಲಿ ಆಸ್ತಿ-ಪಾಸ್ತಿಗಳಿಗೆ ಆಗಿರುವ ಹಾನಿಯ ಅಂದಾಜು ಆರ್ಥಿಕ ವೆಚ್ಚ $350 ಮಿಲಿಯನ್ ಎಂದೂ ಸಚಿವಾಲಯ ತಿಳಿಸಿದೆ.
ಇಸ್ರೇಲಿ ಸೈನ್ಯವು ಸಮಾಧಿಗಳನ್ನು ಅಪವಿತ್ರಗೊಳಿಸುವುದು, ದೇಹಗಳನ್ನು ಹೊರತೆಗೆಯುವುದು ಮತ್ತು ಸತ್ತವರ ವಿರುದ್ಧ ಅವರ ಅವಶೇಷಗಳನ್ನು ಹೊರತೆಗೆದು ವಿರೂಪಗೊಳಿಸುವಂತಹ ಕ್ರೂರ ಹಿಂಸಾಚಾರವನ್ನು ನಡೆಸುತ್ತಿದೆ ಎಂದು ಸಚಿವಾಲಯ ಆರೋಪಿಸಿದೆ.
ಪ್ರಾರ್ಥನಾ ಸ್ಥಳಗಳ ನಾಶದ ಜೊತೆಗೆ, ಸಚಿವಾಲಯವು ತನ್ನ ಅಧಿಕಾರದಲ್ಲಿರುವ 11 ಆಡಳಿತ ಮತ್ತು ಶೈಕ್ಷಣಿಕ ಸಂಸ್ಥೆಗಳನ್ನು ನಾಶಪಡಿಸಿದೆ ಎಂದು ವರದಿಯಾಗಿದೆ.
ಗಾಝಾದ ಧಾರ್ಮಿಕ ಸ್ಥಳಗಳ ಮೇಲಿನ ದಾಳಿಯನ್ನು ಖಂಡಿಸಿದ್ದು, “ನಿರ್ನಾಮದತ್ತ ಸಾಗುತ್ತಿರುವ ಯುದ್ಧವನ್ನು ನಿಲ್ಲಿಸಲು ತಕ್ಷಣವೇ ವಿಶ್ವ ಸಂಸ್ಥೆ ಮತ್ತು ಮುಸ್ಲಿಂ ಸಮುದಾಯ ಸೇರಿದಂತೆ ಅಂತರಾಷ್ಟ್ರೀಯ ಸಮುದಾಯವನ್ನು ಮಧ್ಯಪ್ರವೇಶಿಸುವಂತೆ ಸಚಿವಾಲಯ ಒತ್ತಾಯಿಸಿದೆ.
UN ಭದ್ರತಾ ಮಂಡಳಿಯ ನಿರ್ಣಯವು ತಕ್ಷಣವೇ ಕದನ ವಿರಾಮಕ್ಕೆ ಕರೆ ನೀಡಿದ್ದರೂ, ಕಳೆದ ಅಕ್ಟೋಬರ್ 7 ರಂದು ಹಮಾಸ್ ನಡೆಸಿದ ದಾಳಿಯ ನಂತರ ಇಸ್ರೇಲ್ ,ಗಾಝಾ ಪಟ್ಟಿಯ ಮೇಲೆ ತನ್ನ ಕ್ರೂರ ಆಕ್ರಮಣವನ್ನು ಮುಂದುವರೆಸಿದೆ.
ಸ್ಥಳೀಯ ಆರೋಗ್ಯ ಅಧಿಕಾರಿಗಳ ಪ್ರಕಾರ, 41,800 ಕ್ಕೂ ಹೆಚ್ಚು ಜನರು ಸಾವನ್ನಪ್ಪಿದ್ದು, ಇದರಲ್ಲಿ ಹೆಚ್ಚಿನವರು ಮಹಿಳೆಯರು ಮತ್ತು ಮಕ್ಕಳು. ಸುಮಾರು 96,800 ಕ್ಕೂ ಹೆಚ್ಚು ಜನರು ಗಾಯಗೊಂಡಿದ್ದಾರೆ ಎಂದು ಅಂಕಿ ಸಂಖ್ಯೆ ತಿಳಿಸುತ್ತದೆ.
ಆಹಾರ, ಶುದ್ಧ ನೀರು ಮತ್ತು ಔಷಧದ ತೀವ್ರ ಕೊರತೆಗೆ ಕಾರಣವಾದ ದಿಗ್ಬಂಧನದ ಮಧ್ಯೆ ಇಸ್ರೇಲಿ ದಾಳಿಯು ಆ ಪ್ರದೇಶದ ಬಹುತೇಕ ಜನಸಂಖ್ಯೆಯನ್ನು ಸಂಪೂರ್ಣ ಸ್ಥಳಾಂತರಿಸಿದೆ.
ಗಾಝಾದಲ್ಲಿನ ತನ್ನ ಆಕ್ರಮಣಗಳಿಗೆ ಇಸ್ರೇಲ್ ಅಂತರಾಷ್ಟ್ರೀಯ ನ್ಯಾಯಾಲಯದಲ್ಲಿ ನರಮೇಧದ ಪ್ರಕರಣವನ್ನು ಎದುರಿಸುತ್ತಿದೆ.
