ಸನ್ಮಾರ್ಗ ವಾರ್ತೆ
ಹೊಸದೆಹಲಿ: ನೈಋತ್ಯ ಮಾನ್ಸೂನ್ ಮುಕ್ತಾಯಗೊಂಡಿದ್ದರೂ, ದೇಶದ ಪ್ರಮುಖ ಜಲಾಶಯಗಳಲ್ಲಿ ಇನ್ನೂ ಸಾಕಷ್ಟು ನೀರಿಲ್ಲ. ದೇಶದ 178 ಪ್ರಮುಖ ಜಲಾಶಯಗಳ ಒಟ್ಟು ಸಂಗ್ರಹ ಸಾಮರ್ಥ್ಯದಲ್ಲಿ ಶೇ. 31.42 ರಷ್ಟು ಭಾಗ ಇನ್ನೂ ಭರ್ತಿಯಾಗಬೇಕಿದೆ. ದಕ್ಷಿಣ ಭಾರತದ ರಾಜ್ಯಗಳ ಹಲವಾರು ಅಣೆಕಟ್ಟುಗಳಲ್ಲಿ ನೀರಿನ ಮಟ್ಟವು ಸಾಮಾನ್ಯಕ್ಕಿಂತ ತಳಮಟ್ಟದಲ್ಲಿದ್ದು, ಮುಂದಿನ ತಿಂಗಳುಗಳಲ್ಲಿ ನೀರಿನ ಲಭ್ಯತೆಯ ಬಗ್ಗೆ ಕಳವಳ ಮೂಡಿಸಿದೆ.
ಅಕ್ಟೋಬರ್ 15 ರಂದು ಸೆಂಟ್ರಲ್ ವಾಟರ್ ಕಮಿಷನ್ ಬಿಡುಗಡೆ ಮಾಡಿದ ದತ್ತಾಂಶದ ಪ್ರಕಾರ, 178 ಜಲಾಶಯಗಳಲ್ಲಿ 126.717 ಬಿಲಿಯನ್ ಘನ ಮೀಟರ್ (ಬಿಸಿಎಂ) ನೀರು ಲಭ್ಯವಿದೆ. ಇದು ಒಟ್ಟು ಬಳಸಬಹುದಾದ ಸಂಗ್ರಹ ಸಾಮರ್ಥ್ಯದ ಶೇ. 68.58 ರಷ್ಟಿದೆ. ಈ ವರ್ಷದ ನೀರು ಸಂಗ್ರಹವು ಕಳೆದ ವರ್ಷದ ಇದೇ ಅವಧಿಗಿಂತ 41.193 ಬಿಸಿಎಂ ಅಥವಾ ಶೇ. 24.53 ರಷ್ಟು ಕಡಿಮೆಯಾಗಿದೆ. ಇದು ಕಳೆದ ಹತ್ತು ವರ್ಷಗಳ ಸರಾಸರಿ ಸಂಗ್ರಹ ಮಟ್ಟಕ್ಕಿಂತ 24.930 ಬಿಸಿಎಂ ಅಥವಾ ಶೇ. 16.44 ರಷ್ಟು ಕಡಿಮೆಯಾಗಿದೆ.
ದಕ್ಷಿಣ ಭಾರತದ ಅನೇಕ ಪ್ರಮುಖ ಅಣೆಕಟ್ಟುಗಳಲ್ಲಿ ಪರಿಸ್ಥಿತಿ ಕಳವಳಕಾರಿಯಾಗಿದೆ. ತಮಿಳುನಾಡಿನ ಆಳಿಯಾರ್ ಅಣೆಕಟ್ಟು ತನ್ನ ಸಾಮಾನ್ಯ ಸಂಗ್ರಹ ಮಟ್ಟಕ್ಕೆ ಹೋಲಿಸಿದರೆ ತಳಮಟ್ಟದಲ್ಲಿದೆ. ಆಂಧ್ರಪ್ರದೇಶದ ಸೋಮಶಿಲ ಅಣೆಕಟ್ಟು ಶೇ. 22.05 ರಷ್ಟಿದ್ದರೆ, ಶ್ರೀಶೈಲಂ ತನ್ನ ಸಾಮಾನ್ಯ ಸಂಗ್ರಹ ಮಟ್ಟದ ಶೇ. 33.64 ರಷ್ಟಿದೆ. ಸಾಮಾನ್ಯ ಸಂಗ್ರಹ ಮಟ್ಟಕ್ಕೆ ಹೋಲಿಸಿದರೆ ಪ್ರಸ್ತುತ ಸಂಗ್ರಹವು ತಮಿಳುನಾಡಿನ ಮೇಟ್ಟೂರಿನಲ್ಲಿ ಕೇವಲ ಶೇ. 32.49 ರಷ್ಟಿದೆ ಮತ್ತು ಕೇರಳದ ಇಡುಕ್ಕಿಯಲ್ಲಿ ಶೇ. 10.62 ರಷ್ಟಿದೆ. ಕೇರಳದ ಪೆರಿಯಾರ್ನಲ್ಲಿ ನೀರಿನ ಸಂಗ್ರಹವು ಶೇ. 46.43 ರಷ್ಟಿದೆ.
ಕರ್ನಾಟಕದ ಘಟಪ್ರಭಾ, ತುಂಗಭದ್ರ ಮತ್ತು ಶೋಳಯಾರ್ ಅಣೆಕಟ್ಟುಗಳಲ್ಲಿಯೂ ಸಾಮಾನ್ಯಕ್ಕಿಂತ ಹೆಚ್ಚಿನ ಮಟ್ಟ ದಾಖಲಾಗಿದೆ. ಮಹಾರಾಷ್ಟ್ರದ ಜಾಯ್ಕವಾಡಿ, ಉಜನಿ, ಮಂಜ್ರಾ ಮತ್ತು ಲೋವರ್ ತರ್ನಾ ಅಣೆಕಟ್ಟುಗಳಲ್ಲಿ ನೀರಿನ ಮಟ್ಟವು ಗಮನಾರ್ಹವಾಗಿ ಕುಸಿದಿದೆ.
ಕಾವೇರಿಯಲ್ಲಿ ಶೇ. 60.50 ರಷ್ಟು ಇಳಿಕೆ
ದಕ್ಷಿಣ ಭಾರತದಲ್ಲಿ ನೀರಿನ ಕೊರತೆಯ ತೀವ್ರತೆಯು ನದಿ ಜಲಾನಯನ ಪ್ರದೇಶ ಆಧಾರಿತ ಅಂಕಿಅಂಶಗಳಲ್ಲೂ ಸ್ಪಷ್ಟವಾಗಿದೆ. ಕಾವೇರಿ ಜಲಾನಯನ ಪ್ರದೇಶವು ಸಾಮಾನ್ಯ ಸಂಗ್ರಹ ಮಟ್ಟಕ್ಕಿಂತ ಶೇ. 60.50 ರಷ್ಟು ಕೆಳಗಿದೆ, ಪೆನ್ನಾರ್ ಜಲಾನಯನ ಪ್ರದೇಶವು ಶೇ. 72.32 ರಷ್ಟು ಕೆಳಗಿದೆ, ಕೃಷ್ಣಾ ಜಲಾನಯನ ಪ್ರದೇಶವು ಶೇ. 32.59 ರಷ್ಟು ಕೆಳಗಿದೆ ಮತ್ತು ಸಬರ್ಮತಿ ಜಲಾನಯನ ಪ್ರದೇಶವು ಶೇ. 38.03 ರಷ್ಟು ಕೆಳಗಿದೆ.
ಅದೇ ಸಮಯದಲ್ಲಿ, ನರ್ಮದಾ ಜಲಾನಯನ ಪ್ರದೇಶವು ಶೇ. 7.81 ರಷ್ಟು ಹೆಚ್ಚುವರಿ ನೀರು ಸಂಗ್ರಹವನ್ನು ಹೊಂದಿದೆ, ಮಹಾನದಿ ಶೇ. 2.95 ರಷ್ಟು ಮತ್ತು ಸ್ವರ್ಣ ರೇಖಾ ಸಾಮಾನ್ಯಕ್ಕಿಂತ ಶೇ. 30.74 ರಷ್ಟು ಹೆಚ್ಚಿದೆ. ಜಲವಿದ್ಯುತ್ ಯೋಜನೆಗಳಿಗೆ ಸಂಬಂಧಿಸಿದ 20 ಜಲಾಶಯಗಳ ಪೈಕಿ 12 ಜಲಾಶಯಗಳಲ್ಲಿ ಸಂಗ್ರಹವು ಸಾಮಾನ್ಯ ಮಟ್ಟದಲ್ಲಿದೆ ಅಥವಾ ಕೆಳಗಿದೆ. ಜಲಾಶಯಗಳಲ್ಲಿನ ಕೊರತೆಯು ಮುಂದಿನ ತಿಂಗಳುಗಳಲ್ಲಿ ಕುಡಿಯುವ ನೀರಿನ ಪೂರೈಕೆ, ನೀರಾವರಿ ಮತ್ತು ವಿದ್ಯುತ್ ಉತ್ಪಾದನೆಯ ಮೇಲೆ ಪರಿಣಾಮ ಬೀರುವ ಸಾಧ್ಯತೆಯಿದೆ ಎನ್ನಲಾಗಿದೆ.












