ಸನ್ಮಾರ್ಗ ವಾರ್ತೆ
ನವದೆಹಲಿ:ಯೋಗ ಗುರು ರಾಮದೇವ್ರವರು ಕೇಂದ್ರ ಆರೋಗ್ಯ ಸಚಿವ ಹರ್ಷ್ ವರ್ಧನ್ ಮತ್ತು ಕೇಂದ್ರ ಸಚಿವ ನಿತಿನ್ ಗಡ್ಕರಿ ಅವರ ಸಮ್ಮುಖದಲ್ಲಿ “ಪತಂಜಲಿಯಿಂದ Covid-19ಗಾಗಿ ತಯಾರಿಸಲಾದ ವೈಜ್ಞಾನಿಕವಾಗಿ ದೃಢೀಕೃತ ಮೊದಲ ಔಷಧ- ಕೊರೋನಿಲ್” ಎಂಬ ಸಂಶೋಧನಾ ಪ್ರಬಂಧವನ್ನು ಇಂದು ಬಿಡುಗಡೆ ಮಾಡಿದ್ದಾರೆ.
ಕೊರೊನಿಲ್ಗೆ ಸಂಬಂಧಿಸಿದ ಎಲ್ಲಾ “ಅನುಮಾನಗಳನ್ನು” ಸಂಶೋಧನಾ ಪ್ರಬಂಧವು ತೆರವುಗೊಳಿಸುತ್ತದೆ ಎಂದು ರಾಮದೇವ್ ಈ ಸಂದರ್ಭದಲ್ಲಿ ಹೇಳಿದರು. ಪತಂಜಲಿಯಿಂದ covid-19ಗಾಗಿ ತಯಾರಿಸಲಾದ ಆಯುರ್ವೇದ ಔಷಧ ಇದು. “ನಾವು ಕೊರೊನಿಲ್ ಅನ್ನು ಪ್ರಾರಂಭಿಸಿದಾಗ, ಜನರು ಅದರ ಸಿಂಧುತ್ವದ ಬಗ್ಗೆ ಪ್ರಶ್ನೆಗಳನ್ನು ಎತ್ತಿದರು ಮತ್ತು ನಾವು ವೈಜ್ಞಾನಿಕ ನಿಯತಾಂಕಗಳನ್ನು ಅನುಸರಿಸಿದ್ದೇವೆಯೇ ಎಂಬುದಾಗಿ ಪ್ರಶ್ನಿಸಿದರು. ವಿದೇಶಗಳಲ್ಲಿ ಮಾತ್ರ ಸಂಶೋಧನೆ ನಡೆಸಬಹುದೆಂದು ಜನರು ಭಾವಿಸುತ್ತಾರೆ. ಈ ಸಂಶೋಧನೆಯೊಂದಿಗೆ, ಕೊರೊನಿಲ್ ಬಗ್ಗೆ ಎಲ್ಲಾ ಅನುಮಾನಗಳನ್ನು ನಾವು ತೆರವುಗೊಳಿಸಿದ್ದೇವೆ” ಎಂದು ಅವರು ಹೇಳಿರುವುದಾಗಿ ಎಎನ್ಐ ವರದಿ ಮಾಡಿದೆ.
“ಅಂತಾರಾಷ್ಟ್ರೀಯ ನಿಯತಾಂಕಗಳನ್ನು ಆಧರಿಸಿದ ಸಂಪೂರ್ಣ ವೈಜ್ಞಾನಿಕ ಸಂಶೋಧನಾ ಪುರಾವೆಗಳನ್ನು ಪೂರ್ಣಗೊಳಿಸಿದ ನಂತರ ಸರ್ಕಾರವು ಕೊರೋನಿಲ್ಗೆ ಹಸಿರು ನಿಶಾನೆಯನ್ನು ನೀಡಿದೆ. ದೇಶ ಮತ್ತು ಪ್ರಪಂಚವೂ ಸಹ ಒಪ್ಪಿಕೊಂಡಿದೆ. WHO ಸಹ ಒಪ್ಪಿಕೊಂಡಿದ್ದು,’ಕೊರೊನಿಲ್’ನ್ನು ವೈಜ್ಞಾನಿಕ ಪುರಾವೆಗಳ ಆಧಾರದೊಂದಿಗೆ 150ಕ್ಕೂ ಹೆಚ್ಚು ದೇಶಗಳಲ್ಲಿ ಮಾರಾಟ ಮಾಡುವ ಆಯ್ಕೆಯನ್ನು ನಾವು ಹೊಂದಿದ್ದೇವೆ “ಎಂದು ಅವರು ಹೇಳಿದರು.












