‘ನೋಟ್‌ಬಂದಿ ಮತ್ತು ವೋಟ್‌ಬಂದಿ ಒಂದೇ ನಾಣ್ಯದ ಎರಡು ಮುಖಗಳು’, ಮೋದಿ ಸರ್ಕಾರದ ವಿರುದ್ಧ ಕಾಂಗ್ರೆಸ್ ವಾಗ್ದಾಳಿ

0
3

ಸನ್ಮಾರ್ಗ ವಾರ್ತೆ

ನವದೆಹಲಿ: ನೋಟ್‌ಬಂದಿ ಮತ್ತು ವೋಟ್‌ಬಂದಿ ಒಂದೇ ನಾಣ್ಯದ ಎರಡು ಮುಖಗಳಾಗಿವೆ ಎಂದು ಕಾಂಗ್ರೆಸ್ ಗುರುವಾರ ಆರೋಪಿಸಿದೆ; ನೋಟ್‌ಬಂದಿಯ ಮೂಲಕ ಸಾಮಾನ್ಯ ಜನರ ಗಳಿಕೆ ಮತ್ತು ಜೀವನೋಪಾಯಕ್ಕೆ ಹೊಡೆತ ನೀಡಲಾಗಿತ್ತು, ಆದರೆ ಈಗ ವೋಟ್‌ಬಂದಿಯ ಮೂಲಕ ಅವರ ಪ್ರಜಾಸತ್ತಾತ್ಮಕ ಹಕ್ಕು ಮತ್ತು ಧ್ವನಿಯನ್ನು ಗುರಿಯಾಗಿಸಿಕೊಳ್ಳಲಾಗುತ್ತಿದೆ. ಅಧಿಕಾರದ ಅಹಂಕಾರದಲ್ಲಿ ಮೊದಲು ಜನರ ಗಳಿಕೆ ಮತ್ತು ಜೀವನೋಪಾಯಕ್ಕೆ ಹೊಡೆತ ನೀಡಲಾಗಿತ್ತು ಮತ್ತು ಈಗ ಅವರ ಮತ ಹಾಗೂ ಧ್ವನಿಗೆ ಹೊಡೆತ ಬೀಳುತ್ತಿದೆ ಎಂದು ಪಕ್ಷದ ಪ್ರಧಾನ ಕಾರ್ಯದರ್ಶಿ ಜೈರಾಮ್ ರಮೇಶ್ ‘ಎಕ್ಸ್’ (X) ನಲ್ಲಿನ ಪೋಸ್ಟ್‌ನಲ್ಲಿ ಹೇಳಿದ್ದಾರೆ.

ಪ್ರಜಾಪ್ರಭುತ್ವದಲ್ಲಿ ಬಡವರು, ಕಾರ್ಮಿಕರು, ರೈತರು, ವಂಚಿತರು, ಸಾಮಾಜಿಕವಾಗಿ ಹಿಂದುಳಿದ ವರ್ಗಗಳು, ಯುವಕರು ಮತ್ತು ಮಧ್ಯಮ ವರ್ಗದವರಿಗೆ ತಮ್ಮ ಮಾತನ್ನು ಕೇಳಿಸಿಕೊಳ್ಳಲು ಇರುವ ಅತಿದೊಡ್ಡ ಅಸ್ತ್ರ ಅವರ ಮತವಾಗಿದೆ ಎಂದು ಅವರು ಹೇಳಿದ್ದಾರೆ. ಇದರ ಮೂಲಕವೇ ಜನರು ಸರ್ಕಾರಗಳನ್ನು ತಮ್ಮ ನೀತಿಗಳು ಮತ್ತು ಅವುಗಳ ಫಲಿತಾಂಶಗಳಿಗೆ ಹೊಣೆಗಾರರನ್ನಾಗಿ ಮಾಡುತ್ತಾರೆ. ಜನರ ಜನಾದೇಶದ ಬಗ್ಗೆ ಸರ್ಕಾರಕ್ಕೆ ಕಾಳಜಿ ಇಲ್ಲದಂತಾದಾಗ, ಅದರ ನೀತಿಗಳಲ್ಲೂ ಅಹಂಕಾರ ಕಾಣಿಸಿಕೊಳ್ಳಲು ಆರಂಭಿಸುತ್ತದೆ ಎಂದು ಕಾಂಗ್ರೆಸ್ ಪ್ರಧಾನ ಕಾರ್ಯದರ್ಶಿ ಆರೋಪಿಸಿದ್ದಾರೆ.

ಮನರೇಗಾ ಬದಲಿಗೆ ಹೊಸ ವ್ಯವಸ್ಥೆ ತರುವುದು, ಕಾರ್ಪೊರೇಟ್ ದೇಣಿಗೆ ಮತ್ತು ನೀತಿಗತ ಆದ್ಯತೆಗಳನ್ನು ಉಲ್ಲೇಖಿಸಿದ ರಮೇಶ್, ಇವುಗಳಿಂದ ಸಾಮಾನ್ಯ ನಾಗರಿಕರು, ಗ್ರಾಮೀಣ ಕಾರ್ಮಿಕರು ಮತ್ತು ಯುವಕರ ಹಕ್ಕುಗಳ ಮೇಲೆ ಪರಿಣಾಮ ಬೀರಿದೆ ಎಂದು ಆರೋಪಿಸಿದ್ದಾರೆ. ಬೆಲೆ ಏರಿಕೆಯಿಂದ ಸಾಮಾನ್ಯ ಜನರ ಜೇಬಿಗೆ, ನಿರುದ್ಯೋಗದಿಂದ ಯುವಕರ ಭವಿಷ್ಯಕ್ಕೆ ಮತ್ತು ಮತದಾರರ ಪಟ್ಟಿಯಿಂದ ಹೆಸರುಗಳು ಕಣ್ಮರೆಯಾಗುವುದರಿಂದ ಸರ್ಕಾರವನ್ನು ಆಯ್ಕೆ ಮಾಡುವ ಹಾಗೂ ಅದರಿಂದ ಉತ್ತರ ಕೇಳುವ ಹಕ್ಕಿಗೆ ಧಕ್ಕೆಯಾಗುತ್ತದೆ. “ಮತ ಎನ್ನುವುದು ಕೇವಲ ಸರ್ಕಾರ ರಚಿಸುವ ಹಕ್ಕಲ್ಲ. ಇದು ಸರ್ಕಾರವನ್ನು ಹೊಣೆಗಾರರನ್ನಾಗಿ ಮಾಡುವ ಹಕ್ಕು” ಎಂದು ರಮೇಶ್ ಹೇಳಿದ್ದಾರೆ. ಕಾಂಗ್ರೆಸ್ ಹೋರಾಟ ಕೇವಲ ಮತಗಳನ್ನು ಉಳಿಸುವುದಕ್ಕಲ್ಲ, ಬದಲಿಗೆ ಪ್ರತಿಯೊಬ್ಬ ನಾಗರಿಕನ ಹಕ್ಕನ್ನು ಉಳಿಸುವುದಕ್ಕಾಗಿದೆ ಎಂದು ಅವರು ತಿಳಿಸಿದ್ದಾರೆ.