ಅಜಿಂಕ್ಯ ಶಿಂಧೆ ಯಾರು? ಸಿಜೆಪಿಯ ಮುಂದುವರಿದ ಹೋರಾಟದ ನಾಯಕರಾಗಿ ಅಜಿಂಕ್ಯ ಅವರನ್ನು ಘೋಷಿಸಿದ ಅಭಿಜಿತ್ ದಿಪ್ಕೆ

0
251

ಸನ್ಮಾರ್ಗ ವಾರ್ತೆ

ಹೊಸದೆಹಲಿ: ಸಿಜೆಪಿ ಸಂಚಾಲಕ ಅಭಿಜಿತ್ ದಿಪ್ಕೆ ಮತ್ತು ಸಹ-ಸಂಚಾಲಕರಾದ ಸೌರವ್ ದಾಸ್ ಮತ್ತು ಅಶುತೋಷ್ ರಂಕಾ ಅವರ ಬಂಧನದೊಂದಿಗೆ, ಹೋರಾಟವನ್ನು ಮುನ್ನಡೆಸುವ ಜವಾಬ್ದಾರಿಯನ್ನು ಸಿಜೆಪಿ ರಾಷ್ಟ್ರೀಯ ಸಂಘಟನಾ ನಾಯಕ ಅಜಿಂಕ್ಯ ಶಿಂಧೆ ವಹಿಸಿಕೊಂಡಿದ್ದಾರೆ. ಮುಖ್ಯ ಚುನಾವಣಾ ಆಯುಕ್ತ ಜ್ಞಾನೇಶ್ ಕುಮಾರ್ ಅವರ ರಾಜೀನಾಮೆಯನ್ನು ಒತ್ತಾಯಿಸಿ ಜಂತರ್ ಮಂತರ್ 2.0 ಚಳವಳಿಯನ್ನು ಅಜಿಂಕ್ಯ ಶಿಂಧೆ ಮುನ್ನಡೆಸಲಿದ್ದಾರೆ ಎಂದು ಅಭಿಜಿತ್ ದಿಪ್ಕೆ ವೀಡಿಯೊ ಸಂದೇಶದಲ್ಲಿ ತಿಳಿಸಿದ್ದಾರೆ. ತಾವು ದೆಹಲಿಗೆ ತಲುಪಿದರೆ ತಮ್ಮನ್ನು ಒಳಗೊಂಡಂತೆ ನಾಯಕರು ಬಂಧನಕ್ಕೊಳಗಾಗುವುದು ಸ್ಪಷ್ಟವಾಗಿರುವುದರಿಂದ, ಚಳವಳಿಯ ಉಸ್ತುವಾರಿಯಾಗಿ ಅಜಿಂಕ್ಯ ಶಿಂಧೆ ಅವರನ್ನು ನಿಯೋಜಿಸುತ್ತಿರುವುದಾಗಿ ಅಭಿಜಿತ್ ದಿಪ್ಕೆ ಪೂರ್ವ-ದಾಖಲಿತ ವೀಡಿಯೊದಲ್ಲಿ ಘೋಷಿಸಿದ್ದಾರೆ.

35 ವರ್ಷ ವಯಸ್ಸಿನ ಅಜಿಂಕ್ಯ ಶಿಂಧೆ ಅವರು ಮಹಾರಾಷ್ಟ್ರದಲ್ಲಿ ಆಮ್ ಆದ್ಮಿ ಪಕ್ಷದ ಯುವ ಘಟಕದ ನಾಯಕರಾಗಿದ್ದರು. ಮಹಾರಾಷ್ಟ್ರದ ಎಎಪಿ ಯುವ ಘಟಕದ ಮಾಜಿ ರಾಜ್ಯ ಅಧ್ಯಕ್ಷರಾಗಿರುವ ಶಿಂಧೆ, ಅದರ ಗೋವಾ ಸಹ-ಉಸ್ತುವಾರಿಯಾಗಿಯೂ ಸೇವೆ ಸಲ್ಲಿಸಿದ್ದಾರೆ. ನಂತರ, ಅವರು ಸಿಜೆಪಿಯ ಸಕ್ರಿಯ ಕಾರ್ಯಕರ್ತರಾದರು ಮತ್ತು ಅದರ ರಾಷ್ಟ್ರೀಯ ಸಂಘಟನಾ ಉಸ್ತುವಾರಿಯಾಗಿ ನೇಮಕಗೊಂಡರು.

ಅಭಿಜಿತ್ ದಿಪ್ಕೆ ಮತ್ತು ಅಶುತೋಷ್ ರಂಕಾ ಅವರೊಂದಿಗೆ ನಿಕಟ ಒಡನಾಟ ಹೊಂದಿದ್ದಾರೆ. ಮುಂಚಿತವಾಗಿ ಜಂತರ್ ಮಂತರ್ ಪ್ರತಿಭಟನೆಯನ್ನು ಯೋಜನೆ ಮಾಡುವಲ್ಲಿ ಮತ್ತು ಸಮನ್ವಯಗೊಳಿಸುವಲ್ಲಿ ಅವರು ಪ್ರಮುಖ ಪಾತ್ರ ವಹಿಸಿದ್ದರು. ಜ್ಞಾನೇಶ್ ಕುಮಾರ್ ಅವರ ರಾಜೀನಾಮೆಯನ್ನು ಒತ್ತಾಯಿಸಿ ಅಕ್ಟೋಬರ್ 2 ರಂದು ಮುಂಬೈನ ಶಿವಾಜಿ ಪಾರ್ಕ್‌ನಲ್ಲಿ ನಡೆದ ಪ್ರತಿಭಟನೆಯನ್ನೂ ಶಿಂಧೆ ಮುನ್ನಡೆಸಿದ್ದರು.

ಇವತ್ತು ಬೆಳಿಗ್ಗೆ ದೆಹಲಿ ವಿಮಾನ ನಿಲ್ದಾಣದಿಂದ ವಶಕ್ಕೆ ಪಡೆಯಲಾದ ಅಭಿಜಿತ್ ದಿಪ್ಕೆ, ಅಶುತೋಷ್ ರಂಕಾ ಮತ್ತು ಸೌರವ್ ದಾಸ್ ಅವರನ್ನು ರಹಸ್ಯ ಪೊಲೀಸ್ ಠಾಣೆಗೆ ಸ್ಥಳಾಂತರಿಸಲಾಗಿದೆ. ನಾಯಕರಿಲ್ಲದೆಯೂ ಪ್ರತಿಭಟನೆ ಮುಂದುವರಿಯಲಿದೆ ಮತ್ತು ಮುಷ್ಕರದಿಂದ ಹಿಂದೆ ಸರಿಯುವುದಿಲ್ಲ ಎಂದು ಸಿಜೆಪಿ ತಿಳಿಸಿದೆ.

ಬಂಧನದ ನಂತರ ಮಾತನಾಡಿದ ಅಭಿಜಿತ್ ದಿಪ್ಕೆ, ವಿಮಾನ ನಿಲ್ದಾಣದಲ್ಲಿ ತಮ್ಮನ್ನು ಬಂಧಿಸಿದ ದೆಹಲಿ ಪೊಲೀಸರ ಕ್ರಮವು ತುರ್ತು ಪರಿಸ್ಥಿತಿಯ ಕಾಲದಲ್ಲೂ ಕಾಣದಂಥದ್ದಾಗಿದೆ ಎಂದು ಹೇಳಿದರು. ಅಧಿಕಾರವನ್ನು ಅತಿಯಾಗಿ ಬಳಸಿಕೊಂಡು ಸಾಂವಿಧಾನಿಕ ಚಳವಳಿಯನ್ನು ತಡೆಯಲು ಸರ್ಕಾರ ಪ್ರಯತ್ನಿಸುತ್ತಿದೆ ಎಂದು ಸಿಜೆಪಿ ಸಹ-ಸಂಚಾಲಕ ಸೌರವ್ ದಾಸ್ ಕೂಡ ತಿಳಿಸಿದ್ದಾರೆ.