ಸನ್ಮಾರ್ಗ ವಾರ್ತೆ
ಬರ್ಲಿನ್: ಇಸ್ರೇಲ್ಗೆ ಜರ್ಮನ್ ಸರ್ಕಾರದ ಬೆಂಬಲ ಮತ್ತು ಗಾಝಾದಲ್ಲಿ ನಡೆಯುತ್ತಿರುವ ಜನಾಂಗೀಯ ಹತ್ಯೆಯ ಕುರಿತು ಸರ್ಕಾರದ ಮೌನವನ್ನು ವಿರೋಧಿಸಿ ಪ್ರತಿಭಟನಾಕಾರರು ಬರ್ಲಿನ್ನಲ್ಲಿರುವ ಸಂಸತ್ತಿನ ಮುಂಭಾಗದಲ್ಲಿದ್ದ ಜರ್ಮನಿಯ ರಾಷ್ಟ್ರಧ್ವಜವನ್ನು ಕೆಳಗಿಳಿಸಿ ಫಲೆಸ್ತೀನ್ ಧ್ವಜವನ್ನು ಹಾರಿಸಿದ್ದಾರೆ.
ಘಟನೆಗೆ ಸಂಬಂಧಿಸಿದಂತೆ ಪೊಲೀಸರು ಸ್ಥಳದಿಂದ ಮೂವರು ಹೋರಾಟಗಾರರನ್ನು ಬಂಧಿಸಿದ್ದಾರೆ. ದೇಶ ಮತ್ತು ರಾಷ್ಟ್ರೀಯ ಸಂಕೇತಗಳನ್ನು ಅವಮಾನಿಸಿದ ಆರೋಪದ ಮೇಲೆ ಅವರನ್ನು ಬಂಧಿಸಲಾಗಿದೆ. ಪೊಲೀಸರು ಘಟನೆಯ ಕುರಿತು ವಿವರವಾದ ತನಿಖೆ ನಡೆಸುತ್ತಿದ್ದಾರೆ.
ಈ ಪ್ರತಿಭಟನೆಯ ನೇತೃತ್ವವನ್ನು ‘ಪೀಸ್ಫುಲ್ಲಿ ಅಗೇನ್ಸ್ಟ್ ಜೆನೋಸೈಡ್’ (Peacefully Against Genocide) ಸಂಘಟನೆ ವಹಿಸಿತ್ತು. ಫಲೆಸ್ತೀನ್ ಜನರೊಂದಿಗೆ ಒಗ್ಗಟ್ಟನ್ನು ವ್ಯಕ್ತಪಡಿಸಲು ಮತ್ತು ನರಮೇಧ ಹಾಗೂ ಮಾನವ ಹಕ್ಕುಗಳ ಉಲ್ಲಂಘನೆಯ ವಿರುದ್ಧ ಕ್ರಮ ಕೈಗೊಳ್ಳಲು ಜರ್ಮನ್ ರಾಜಕಾರಣಿಗಳ ವೈಫಲ್ಯವನ್ನು ಖಂಡಿಸಲು ಈ ಪ್ರತಿಭಟನೆ ನಡೆಸಲಾಗಿದೆ ಎಂದು ಸಂಘಟನೆ ತಿಳಿಸಿದೆ.
“ವಿಶ್ವದಲ್ಲಿ ಎಲ್ಲಿಯೇ ಜನಾಂಗೀಯ ಹತ್ಯೆ ನಡೆದರೂ, ಅದು ನಮ್ಮೆಲ್ಲರ ಮೇಲೆಯೂ ಪರಿಣಾಮ ಬೀರುತ್ತದೆ. ಮಾನವೀಯತೆಯ ವಿರುದ್ಧದ ಅಪರಾಧಗಳನ್ನು ತಡೆಯುವ ನಮ್ಮ ಜವಾಬ್ದಾರಿಯಿಂದ ನಾವು ಹಿಂದೆ ಸರಿಯಬಾರದು,” ಎಂದು ಸಂಘಟನೆಯ ವಕ್ತಾರ ಆರನ್ ಹೇಳಿದ್ದಾರೆ. ಅಂತಾರಾಷ್ಟ್ರೀಯ ಕಾನೂನು ಮತ್ತು ಮಾನವ ಹಕ್ಕುಗಳು ಎಲ್ಲರಿಗೂ ಸಮಾನವಾಗಿ ಅನ್ವಯಿಸದಿದ್ದರೆ ಅದಕ್ಕೆ ಏನು ಅರ್ಥವಿದೆ ಎಂದು ಅವರು ಪ್ರಶ್ನಿಸಿದರು. ಇಸ್ರೇಲ್ಗೆ ಶಸ್ತ್ರಾಸ್ತ್ರ ಪೂರೈಕೆಯನ್ನು ತಕ್ಷಣವೇ ಸ್ಥಗಿತಗೊಳಿಸುವಂತೆ ಮತ್ತು ಶಸ್ತ್ರಾಸ್ತ್ರ ತಯಾರಕ ಸಂಸ್ಥೆ ರೈನ್ಮೆಟಾಲ್ (Rheinmetall) ಬರ್ಲಿನ್ನಲ್ಲಿ ತನ್ನ ಕಾರ್ಯಾಚರಣೆಯನ್ನು ಸ್ಥಗಿತಗೊಳಿಸುವಂತೆ ಸಂಘಟನೆ ಕರೆ ನೀಡಿದೆ.
ಜರ್ಮನ್ ಸಂಸತ್ತಿನ ಒಳಗಡೆ ಫಲೆಸ್ತೀನ್ ಪರ ಪ್ರತಿಭಟನೆ ನಡೆದಿರುವುದು ಇದೇ ಮೊದಲ ಬಾರಿಯಲ್ಲ. ಕಳೆದ ವರ್ಷದ ಜೂನ್ನಲ್ಲಿ, ಎಡಪಕ್ಷದ (Left Party) ಸಂಸದ ಕ್ಯಾನ್ಸಿನ್ ಕೊಕ್ಟುರ್ಕ್ ಅವರು “ಫಲೆಸ್ತೀನ್” ಎಂದು ಬರೆದ ಟೀ-ಶರ್ಟ್ ಧರಿಸಿದ್ದಕ್ಕಾಗಿ ಸಂಸತ್ತಿನ ಅಧಿಕಾರಿಗಳು ಅವರನ್ನು ಸಭೆಯಿಂದ ಹೊರಹೋಗುವಂತೆ ಕೇಳಿಕೊಂಡಿದ್ದರು. ಕೊಕ್ಟುರ್ಕ್ ಕಠಿಣ ಭಾಷೆಯಲ್ಲಿ ಇದಕ್ಕೆ ಪ್ರತಿಕ್ರಿಯಿಸಿದ್ದರು.












