ಬ್ರಿಟನ್‌ | ಪ್ರತಿ ಐದು ದಿನಗಳಿಗೊಮ್ಮೆ ಮಸೀದಿಯ ಮೇಲೆ ದಾಳಿ: ಬ್ರಿಟಿಷ್ ಮುಸ್ಲಿಂ ಟ್ರಸ್ಟ್ ಮಾಹಿತಿ

0
302

ಸನ್ಮಾರ್ಗ ವಾರ್ತೆ

ಬ್ರಿಟಿಷ್ ಮುಸ್ಲಿಂ ಟ್ರಸ್ಟ್ (ಬಿಎಂಟಿ) ಬಿಡುಗಡೆ ಮಾಡಿದ ಹೊಸ ಅಂಕಿಅಂಶಗಳ ಪ್ರಕಾರ, ಯುನೈಟೆಡ್ ಕಿಂಗ್‌ಡಮ್‌ನಲ್ಲಿ ಪ್ರತಿ ಐದು ದಿನಗಳಿಗೊಮ್ಮೆ ಮಸೀದಿಯ ಮೇಲೆ ದಾಳಿ ನಡೆಯುತ್ತಿದೆ. ಈ ಸಂಸ್ಥೆಯು ಕಳೆದ ಒಂದು ವರ್ಷದಲ್ಲಿ ಮಸೀದಿಗಳ ಮೇಲೆ 70 ಕ್ಕೂ ಹೆಚ್ಚು ದಾಳಿಗಳನ್ನು ದಾಖಲಿಸಿದೆ.

ಮುಸ್ಲಿಮರ ವಿರುದ್ಧದ ದ್ವೇಷವನ್ನು ಮೇಲ್ವಿಚಾರಣೆ ಮಾಡಲು ಸರ್ಕಾರದ ಪಾಲುದಾರರಾಗಿರುವ ಈ ಸಂಸ್ಥೆಯ ಪ್ರಕಾರ, ಕಳೆದ ವರ್ಷ ದಾಖಲಾದ ಮಸೀದಿಗಳ ಮೇಲಿನ 70 ಕ್ಕೂ ಹೆಚ್ಚು ದಾಳಿಗಳಲ್ಲಿ ಹಿಂಸಾಚಾರ, ಬೆದರಿಕೆ, ವಿಧ್ವಂಸಕ ಕೃತ್ಯ, ಆಸ್ತಿ ಹಾನಿ, ಕಿರುಕುಳ, ದ್ವೇಷಪೂರಿತ ಭಾಷಣ ಮತ್ತು ಆನ್‌ಲೈನ್ ನಿಂದನೆಯ ಘಟನೆಗಳು ಸೇರಿವೆ.

ಲಂಡನ್, ಗ್ರೇಟರ್ ಮ್ಯಾಂಚೆಸ್ಟರ್ ಮತ್ತು ವೆಸ್ಟ್ ಮಿಡ್‌ಲ್ಯಾಂಡ್ಸ್ ಪ್ರದೇಶಗಳಲ್ಲಿ ಅತ್ಯಧಿಕ ಸಂಖ್ಯೆಯ ದಾಳಿಗಳು ದಾಖಲಾಗಿವೆ. ಲಂಡನ್‌ನಲ್ಲಿ ಮಸೀದಿಗಳನ್ನು ಗುರಿಯಾಗಿಸಿಕೊಂಡು ಒಂಬತ್ತು ಪ್ರತ್ಯೇಕ ಘಟನೆಗಳು ನಡೆದಿವೆ, ಆದರೆ ಬರ್ಮಿಂಗ್ಹ್ಯಾಮ್‌ನಲ್ಲಿರುವ ಒಂದು ಮಸೀದಿಯ ಮೇಲೆ ಒಂದು ವರ್ಷದಲ್ಲಿ ಮೂರು ಬಾರಿ ದಾಳಿ ನಡೆಸಲಾಗಿದೆ.

ಪೂರ್ವ ಲಂಡನ್ ಮಸೀದಿ ಸೇರಿದಂತೆ ಹಲವಾರು ಮಸೀದಿಗಳು ರಕ್ಷಣಾ ಕ್ರಮಗಳಿಗಾಗಿ ಸರ್ಕಾರದ ಧನಸಹಾಯವನ್ನು ಪಡೆಯಲು ಹೆಣದಾಡುತ್ತಿರುವಾಗ ಹೆಚ್ಚುತ್ತಿರುವ ಭದ್ರತಾ ಬೆದರಿಕೆಗಳ ಬಗ್ಗೆ ಎಚ್ಚರಿಕೆ ನೀಡಿವೆ. ಈ ನಿಟ್ಟಿನಲ್ಲಿ ಸಮುದಾಯದ ನಾಯಕರು ತುರ್ತು ಕ್ರಮಕ್ಕೆ ಆಗ್ರಹಿಸಿದ್ದಾರೆ.

ಇಂಗ್ಲೆಂಡ್ ಮತ್ತು ವೇಲ್ಸ್‌ನಲ್ಲಿ ಮುಸ್ಲಿಂ ವಿರೋಧಿ ಅಪರಾಧಗಳು ಶೇಕಡಾ 19 ರಷ್ಟು ಹೆಚ್ಚಾಗಿವೆ ಎಂದು ಹೋಮ್ ಆಫೀಸ್‌ನ ದತ್ತಾಂಶಗಳು ತೋರಿಸಿವೆ. ಮಾರ್ಚ್ 2024 ಕ್ಕೆ ಕೊನೆಗೊಂಡ ವರ್ಷದಲ್ಲಿ 2,690 ಅಪರಾಧಗಳಿದ್ದರೆ, ಮಾರ್ಚ್ 2025 ಕ್ಕೆ ಕೊನೆಗೊಂಡ ವರ್ಷದಲ್ಲಿ ಅವು 3,199 ಕ್ಕೆ ಏರಿವೆ. ಮುಸ್ಲಿಂ ವಿರೋಧಿ ದ್ವೇಷವು ವ್ಯಾಪಕವಾಗಿ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಈ ಅಂಕಿಅಂಶಗಳು ಹೊರಬಂದಿವೆ.

“ನಾವು ಮಸೀದಿಗಳ ವಿರುದ್ಧದ ದಾಳಿಗಳ ಸಂಖ್ಯೆಯಲ್ಲಿ ಸ್ಥಿರವಾದ ಏರಿಕೆಯನ್ನು ಕಾಣುತ್ತಿದ್ದೇವೆ. ಮಸೀದಿಗಳು ತಮ್ಮನ್ನು ತಾವು ರಕ್ಷಿಸಿಕೊಳ್ಳಲು ಸಹಾಯ ಮಾಡಲು ಸರ್ಕಾರವು ತನ್ನಿಂದ ಸಾಧ್ಯವಿರುವ ಎಲ್ಲವನ್ನೂ ಮಾಡಬೇಕು ಎಂದು ನಾವು ನಂಬುತ್ತೇವೆ” ಎಂದು ಬಿಎಂಟಿ ಮುಖ್ಯ ಕಾರ್ಯನಿರ್ವಹಣಾ ಅಧಿಕಾರಿ ಅಕೀಲಾ ಅಹ್ಮದ್ ತಿಳಿಸಿದ್ದಾರೆ.

ಯುಕೆ ಸರ್ಕಾರವು 2026-27ರ ಅವಧಿಯಲ್ಲಿ ಮಸೀದಿಗಳು, ಮುಸ್ಲಿಂ ಶಾಲೆಗಳು ಮತ್ತು ಸಮುದಾಯ ಕೇಂದ್ರಗಳಲ್ಲಿ ಭದ್ರತಾ ಕ್ರಮಗಳಿಗಾಗಿ 40 ಮಿಲಿಯನ್ ಪೌಂಡ್‌ಗಳವರೆಗೆ (53 ಮಿಲಿಯನ್ ಡಾಲರ್) ಭರವಸೆ ನೀಡಿದೆ. ಅರ್ಹ ಸಂಸ್ಥೆಗಳು ಸಿಸಿಟಿವಿ ವ್ಯವಸ್ಥೆಗಳು, ಅಲಾರ್ಮ್‌ಗಳು, ಬೇಲಿಗಳು ಮತ್ತು ಭದ್ರತಾ ಸಿಬ್ಬಂದಿ ಧನಸಹಾಯಕ್ಕಾಗಿ ಅರ್ಜಿ ಸಲ್ಲಿಸಬಹುದು.

ಆದಾಗ್ಯೂ, ಅಧಿಕಾರಶಾಹಿಯ ಅಡೆತಡೆಗಳು ಮತ್ತು ದೀರ್ಘಕಾಲದ ವಿಳಂಬದಿಂದಾಗಿ ಅನೇಕ ಮುಸ್ಲಿಂ ಸಮುದಾಯಗಳು ಸಾಕಷ್ಟು ರಕ್ಷಣೆಯಿಂದ ವಂಚಿತವಾಗಿವೆ ಎಂದು ಬಿಎಂಟಿ ಹೇಳಿದೆ.

ಅಲ್ಲದೇ, ಬ್ರಿಟಿಷ್ ಮುಸ್ಲಿಂ ಟ್ರಸ್ಟ್ ಮತ್ತು ಬ್ರಿಟಿಷ್ ಫ್ಯೂಚರ್‌ನ ಇತ್ತೀಚಿನ ಅಧ್ಯಯನವೊಂದರ ಪ್ರಕಾರ, ಪ್ರತಿ ಆರು ಮಂದಿ ಬ್ರಿಟಿಷರಲ್ಲಿ ಒಬ್ಬರು ಬೆಳೆಯುತ್ತಿರುವ ಮುಸ್ಲಿಂ ಜನಸಂಖ್ಯೆಯನ್ನು “ಯುಕೆ ಸಂಸ್ಕೃತಿಗೆ ಮೂಲಭೂತ ಬೆದರಿಕೆ” ಎಂದು ಪರಿಗಣಿಸಿದ್ದಾರೆ. ಇದು ಬ್ರಿಟಿಷ್ ಸಮಾಜದ ಕೆಲವು ಭಾಗಗಳಲ್ಲಿ ಹೆಚ್ಚುತ್ತಿರುವ ಮುಸ್ಲಿಂ ವಿರೋಧಿ ಭಾವನೆಯನ್ನು ಎತ್ತಿ ತೋರಿಸುತ್ತದೆ.